حان جىڭ بىلاي دەدى: كليمات وزگەرىسى بۇكىل ادامزاتتىڭ باقىتىنا سايادى. جۇڭگو كليمات وزگەرىسىنە بەلسەنە توتەپ بەرۋ مەملەكەتتىك ستراتەگياسىن اتقارىپ كەلەدى، دۇنيە ٴجۇزىنىڭ ەكولوگيالىق وركەنيەت قۇرىلىسىنداعى ماڭىزدى ات سالىسۋشى، ۇلەس قوسۋشى، جەتەكشىلىك ەتۋشى سانالادى. بىلتىر ٴتوراعا شي جينپيڭ جۇڭگونىڭ 2030-جىلدان بۇرىن كومىرتەگى قوس توتىعىن ٴبولىپ شىعارۋدى ەڭ جوعارى شەكتەن اسىرماي توقتاتۋدى، 2060 ـ جىلدان بۇرىن كومىر تۇتىنۋدى نورمال كۇيگە تۇسىرۋ، سونداي ـ اق مەملەكەتتىڭ دەربەس ۇلەس قوسۋ تەبىنىن جوعارىلاتۋعا كۇش سالاتىندىعىن جاريالادى. جۇڭگونىڭ كليمات وزگەرىسىنە توتەپ بەرۋدەگى پوزيتسياسى باتىل، ارەكەتى پارمەندى. ٴبىز وسى نىسانالاردى تىڭعىلىقتى جۇزەگە اسىرامىز.

    حان جىڭ بىلاي دەپ اتاپ كورسەتتى: جۇڭگو مەن ا ق ش دۇنيە جۇزىندەگى ەڭ ٴىرى دامۋ ۇستىندەگى ەل جانە ەڭ ٴىرى دامىعان ەل رەتىندە كليمات وزگەرىسىنە توتەپ بەرۋ جاعىندا كوپتەگەن ورتاق مۇددەگە يە. جۇڭگو ا ق ش ـ پەن كليمات وزگەرىسىنە توتەپ بەرۋ جونىندەگى پىكىرلەسۋ مەن سەلبەستىكتى ورىستەتۋگە ٴمان بەرەدى، ا ق ش ـ تىڭ «پاريج كەلىسىمىنە» قايتا ورالۋىن قارسى الادى، ا ق ش ـ تىڭ» پاريج كەلىسىمىن» قورعاپ، وتەۋگە ٴتيىستى جاۋاپكەرشىلىكتى ارقالاپ، ٴتيىستى ۇلەس قوسۋىن ٴۇمىت ەتەدى. كليمات وزگەرىسىنە توتەپ بەرۋدە ورتاق ٴارى پارىقتى جاۋاپكەرشىلىك پرينسيپىنە بويسۇنۋ قاجەت. جۇڭگو ا ق ش ـ پەن ٴوز باسىمدىقتارىن ساۋلەلەندىرىپ، پىكىرلەسۋ مەن سەلبەستىكتى ساقتاپ، «پاريج كەلىسىمىن» تياناقتاندىرۋدى ٴار جاقپەن بىرگە ىلگەرىلەتۋدى قالايدى.

    كەرري بىلاي دەدى: كليمات وزگەرىسى سىندى الەمدىك سايىسقا توتەپ بەرۋدە ا ق ش پەن جۇڭگونىڭ سەلبەستىگى توتەنشە ماڭىزدى. جۇڭگو كليمات وزگەرىسىنە توتەپ بەرۋ جولىندا وراسان زور قۇلشىنىستار جاسادى. ا ق ش جۇڭگومەن قارىم ـ قاتىناستى كۇشەيتىپ، سەلبەستىكتى تەرەڭدەتىپ، «پاريج كەلىسىمىنىڭ» نىساناسىن جەدەل تياناقتاندىرىپ، كليمات وزگەرىسى داعدارىسىنا توتەپ بەرۋگە اناعۇرلىم زور ۇلەس قوسۋدى قالايدى.

اۋدارعان: سەرىك راقىم ۇلى