ٴوز حابارىمىز. مەملەكەت ٴتوراعاسى شي جينپيڭ مەن يسلانديانىڭ پرەزيدەنتى جون نەرسون 12-ايدىڭ 8-كۇنى ٴوزارا قۇتتىقتاۋ تەلەگرامما جولداپ، ەكى ەلدىڭ ديپلوماتيالىق قاتىناس ورناتقاندىعىنىڭ 50 جىلدىعىن قۇتتىقتادى.

    شي جينپيڭ قۇتتىقتاۋ تەلەگرامماسىندا مىنالاردى انىق ايتتى: جۇڭگو مەن يسلانديا ديپلوماتيالىق قاتىناس ورناتقان 50 جىلدان بەرى، ەكى ەلدىڭ ٴار سالاداعى ناقتى سەلبەستىگىندە بەلسەندى جەتىستىكتەرگە قول جەتىپ، ەكى ەل حالقى باقىتقا كەنەلدى. مەن جۇڭگو ـ يسلانديا قاتىناسىن دامىتۋعا ايرىقشا ٴمان بەرەمىن، سىزبەن بىرلىكتە قۇلشىنىپ، ەكى ەلدىڭ ديپلوماتيالىق قاتىناس ورناتقاندىعىنىڭ 50 جىلدىعى تىڭ باستاماسىندا، جۇڭگو ـ يسلانديا قاتىناسىنىڭ ٴوزارا قۇرمەت ەتۋ، ٴوزارا پايدا جەتكىزە ورتاق يگىلىكتەنۋ نەگىزىندە ۇزدىكسىز تىڭ ىلگەرىلەۋشىلىككە قول جەتكىزۋىن جەبەپ، ەكى ەل مەن ەكى ەل حالقىنا باقىت جاراتۋدى قالايمىن.

    جون نەرسون بىلاي دەدى: يسلانديا مەن جۇڭگونىڭ دوستىعى تەرەڭ. ەكى جاقتىڭ ساۋدا، ساياحات، مادەنيەت، وقۋ ـ اعارتۋ، عىلمي زەرتتەۋ سياقتى كوپتەگەن سالالارداعى سەلبەستىگى تىعىز. ەكى جاقتىڭ تۇسىنىستىكتى، سۇحاتتى ساقتاپ، ەكى ەلدىڭ كوركەيىپ-گۇلدەنگەن، باقىتتى، حاۋىپسىز بولاشاعىن ورتاق قۇرۋعا قۇلشىنۋىن ٴۇمىت ەتەمىن.

    سول كۇنى مەملەكەتتىك كەڭەستىڭ زۇڭليى لي كىچياڭ مەن يسلانديانىڭ زۇڭليى ياكوبستور ٴوزارا قۇتتىقتاۋ تەلەگرامما جولدادى. لي كىچياڭ قۇتتىقتاۋ تەلەگراماسىندا بىلاي دەدى: جۇڭگو ۇكىمەتى جۇڭگو–يسلانديا قاتىناسىن دامىتۋعا ايرىقشا ءمان بەرەدى، مەن وزىڭىزبەن بىرلىكتە قۇلشىنىپ، ەكى ەلدىڭ ديپلوماتيالىق قاتىناس ورناتقاندىعىنىڭ 50 جىلدىعىن وراي ەتە، جۇڭگو–يسلانديا قاتىناسىنىڭ جانە ءار سالاداعى ناقتى سەلبەستىكتەرىنىڭ ءتىپتى دە زور دامۋشىلىقتارعا قول جەتكىزۋىن جەبەۋدى قالايمىن. ياكوبستور بىلاي دەدى : يسلاندياـ جۇڭگو ەركىن ساۋدا كەلىسىمىنىڭ اتقارىلۋى جانە ەكى جاقتى ساۋدانىڭ ارتۋى ەكى جاقتىڭ ٴوزارا ٴتۇسىنىسۋىن جەبەپ قانا قويماي، ەكى ەل حالقىن جاقىنداتتى. بەيجيڭ قىسقى وليمپيك سپورت جارىسى يسلانديا- جۇڭگو قاتىناسىن تەرەڭدەتۋگە جاڭا وراي ازىرلەيدى. ەكى جاقتىڭ سەلبەستىكتى ۇزدىكسىز تەرەڭدەتىپ، ەكى ەلدىڭ اناعۇرلىم كوركەم بولاشاعىن اشۋىن ٴۇمىت ەتەمىن.

اۋدارعان: قاناتبەك جۇماباي ۇلى