شي جينپيڭ «اۋەلگى ماقساتتى ۇمىتپاي، بورىشتى ەستە بەرىك ساقتاۋ جۇڭگو كوممۋنيستىك پارتياسى تاريحى كورمەسىن» ەكسكۋرسيالاعاندا: كۇرەس بارىسىن ەستە بەرىك ساقتاپ، تاريحي بورىشتى ارقالاۋ، پارتيانىڭ كۇرەس تاريحىنان العا باسۋعا كۇش قابىلداۋ كەرەك،-دەپ باسا دارىپتەدى، شي جينپيڭ پارتيالى باسشى جولداستاردى باستاپ پارتياعا كىرۋ سەرتىن قايتالاپ ايتتى، لي كىچياڭ، لي جانشۋ، ۋاڭ ياڭ، ۋاڭ حۋنيڭ، جاۋ لىجي، حان جىڭ، ۋاڭ چيشان قيمىلدا بىرگە بولدى

ٴوز حابارىمىز. جۇڭگو كوممۋنيستىك پارتياسى قۇرىلعاندىعىنىڭ 100 جىلدىعىن قۇتتىقتاۋ قارساڭىندا، ج ك پ ورتالىق كوميتەتىنىڭ باس شۋجيى، مەملەكەت ٴتوراعاسى، ورتالىق اسكەري ىستەر كوميتەتىنىڭ ٴتوراعاسى شي جينپيڭ 6-ايدىڭ 18-كۇنى جۇڭگو كوممۋنيستىك پارتياسىنىڭ تاريحي كورمە سارايىنا بارىپ، «اۋەلگى ماقساتتى ۇمىتپاي، بورىشتى ەستە بەرىك ساقتاۋ جۇڭگو كوممۋنيستىك پارتياسىنىڭ تاريحى كورمەسىن» ەكسكۋرسيالادى ٴارى پارتيالى باسشى جولداستاردى باستاپ پارتياعا كىرۋ سەرتىن قايتالاپ ايتتى. ول مىنالاردى باسا دارىپتەدى: پارتيا تاريحى−ەڭ جاندى، ەڭ يلانىمدى وقۋلىق. پارتيامىزدىڭ 100 جىل تاريحى−اۋەلگى ماقساتتى امالياتتا ايگىلەۋ مۇرات ەتىلگەن 100 جىل؛ جاپا ماشاقاتتاردى باستان كەشىرە قاجىرلىلىقپەن نەگىز قالاپ، ناتيجە جاراتقان 100 جىل؛ شۇعىلالى تابىس جاراتىپ، بولاشاققا جول اشقان 100 جىل. وتكەن كۇرەس جولىنا قايىرىلا قاراپ، بولاشاقتاعى العا باسۋ جولىنا كوز سالعاندا، پارتيانىڭ تاريحىن، ٴسوز جوق، ويداعىداي ۇيرەنۋ، ويداعىداي قورىتىندىلاۋ، پارتيانىڭ قىمباتتى تاجىريبەلەرىن ويداعىداي جالعاستىرۋ، ويداعىداي ساۋلەلەندىرۋ؛ كۇرەس بارىسىن ەستە بەرىك ساقتاپ، تاريحي بورىشتى ارقالاۋ، پارتيانىڭ كۇرەس تاريحىنان العا باسۋعا كۇش قابىلداۋ كەرەك. قالىڭ پارتيا مۇشەلەرىن، كادرلاردى ەكسكۋرسيالاۋعا، ۇيرەنۋگە تاربيەلەۋ، جەتەكتەۋ كەرەك. اۋەلگى ماقساتتى اناعۇرلىم سانالى تۇردە ۇمىتپاۋ، بورىشتى ەستە بەرىك ساقتاۋ؛ «ٴتورت تانىمدى» كۇشەيتىپ، «ٴتورت سەنىمدى» بەكەمدەپ، يدەيادا، ساياسيدا، ارەكەتتە پارتيا ورتالىق كوميتەتىمەن باستان-اياق وسكەلەڭ ٴبىر اۋىزدىلىقتى ساقتاۋ كەرەك. مۇرات-سەنىمدى بەكەمدەپ، پارتيانىڭ جاڭالىق جاراتۋ نازارياسىن ويداعىداي ۇيرەنۋ جانە ويداعىداي پايدالانۋ؛ توڭكەرىستىك گەندى جالعاستىرىپ، داڭقتى ٴداستۇردى، اۆانگارد ۇلگىلىك رولدى ساۋلەلەندىرۋ؛ بۇكىل ەلدەگى ٴار ۇلت حالقىن ىنتىماقتاستىرىپ جانە باستاپ، جاڭا دامۋ ساتىسىن تياناق ەتۋ، جاڭا دامۋ تانىمىن دايەكتەندىرۋ، جاڭا دامۋ جاعدايىن قالىپتاستىرۋ كەرەك. رەفورما، دامۋ، ورنىقتىلىق قىزمەتتەرىن جالپى بەتتىك ويداعىداي ىستەۋ؛ جالپى بەتتىك سوتسياليستىك وسىزاماندانعان مەملەكەت قۇرۋعا، جۇڭحۋا ۇلتىنىڭ ۇلى كوركەيۋى سىندى جۇڭگو ارمانىن جۇزەگە اسىرۋعا قۇدىرەتتى كۇش ۇيىستىرۋ كەرەك. 

لي كىچياڭ، لي جانشۋ، ۋاڭ ياڭ، ۋاڭ حۋنيڭ، جاۋ لىجي، حان جىڭ، ۋاڭ چيشان قيمىلعا قاتىناستى.

جاڭادان سالىنىپ بولعان جۇڭگو كوممۋنيستىك پارتياسىنىڭ تاريحي كورمە سارايى اسقاق ايبىنمەن بوي كوتەرىپ تۇر. تۇستەن كەيىن ساعات 3 تەن 20 مينۋت وتكەندە، پارتيا مەن مەملەكەتتىڭ شي جينپيڭ قاتارلى باسشى جولداستارى وسى اراعا كەلىپ، كورمە زالىنا كىردى. كورمەدە «اۋەلگى ماقساتتى ۇمىتپاۋ، بورىشتى ەستە بەرىك ساقتاۋ» نەگىزگى تاقىرىپ ەتىلگەن. «جۇڭگو كوممۋنيستىك پارتياسىن قۇرىپ، جاڭا دەموكراتيالىق توڭكەرىستىڭ ۇلى جەڭىسىنە قول جەتكىزۋ»؛ «جۇڭحۋا حالىق رەسپۋبليكاسىن قۇرىپ، سوتسياليستىك توڭكەرىس پەن قۇرىلىستى جۇرگىزۋ»؛ «رەفورما جاساپ، ەسىك اشۋ ارقىلى جۇڭگوشا سوتسياليزمدى جاراتۋ جانە دامىتۋ»؛ «جۇڭگوشا سوتسياليزمنىڭ جاڭا داۋىرگە ٴوتۋىن ىلگەرىلەتىپ، جالپى بەتتىك دوڭگەلەك داۋلەتتى قوعام قۇرىپ شىعۋ، جالپى بەتتىك سوتسياليستىك وسىزاماندانعان مەملەكەت قۇرۋدىڭ جاڭا جورىعىن باستاۋ» سىندى 4 ٴبولىم بويىنشا دەن قويا جوبالانعان. 2600 دەن استام سۋرەت، 3500 دەن استام مادەني مۇرا زاتتارى كورمەگە قويىلۋ ارقىلى جۇڭگو كوممۋنيستىك پارتياسىنىڭ قۇلاشىن كەڭ جايعان 100 جىلدىق بارىسى تۇڭعىش رەت جان-جاقتىلى، تۇتاس بارىستىق، جالپى كورىنىستىك، تاريحي ەپوستىق تۇرعىدان ايگىلەنگەن. پارتيانىڭ قاجىماي-تالماي كۇرەس جۇرگىزۋ تاريحى، قۇربان بەرۋدەن قورىقپاۋ تاريحى، نازاريالىق ىزدەنىس تاريحى، حالىققا باقىت جاراتۋ تاريحى، وزىندىك قۇرىلىس تاريحى تەرەڭ بەينەلەنگەن. ادامدارعا قىزىل اكىمياتتىڭ وڭاي-وسپاق قولعا كەلمەگەندىگى، جاڭا جۇڭگونىڭ وڭاي-وسپاق قۇرىلماعاندىعى، جۇڭگوشا سوتسياليزمنىڭ وڭاي-وسپاق قۇرىلماعاندىعى تەرەڭ ۇعىندىرىلعان. جۇڭگو كوممۋنيستىك پارتياسىنىڭ نە ٴۇشىن كەلەلى ىستەردى ىستەي الاتىندىعى، ماركسيزمنىڭ نە ٴۇشىن جالپىلاسا الاتىندىعى، جۇڭگوشا سوتسياليزمنىڭ نە ٴۇشىن ابزال ەكەندىگى تولىق دالەلدەنگەن. 

ايبىندى ۇلى قورعان نەگىزگى تاقىرىبىنداعى سىرلاما سۋرەت؛ ماركستىڭ «برۋسسەل ەستەلىكتەرىنىڭ» 4-ەستەلىك قولجازباسى؛ 1-قۇرىلتاي اشىلعان ورىننىڭ قالپىنا كەلتىرىلگەن اۋەلگى كورىنىسى؛ توڭكەرىستىك بازالاردىڭ قۇرىلۋ كورمە تاقتاسى؛ زۇن-يي ٴماجىلىسىنىڭ قالپىنا كەلتىرىلگەن اۋەلگى كورىنىسى؛ پارتيا 7-قۇرىلتايىنىڭ داۋىس بەرۋ ساندىعى؛ مەملەكەت قۇرۋ سالتاناتتىنىڭ كورىلىم كەسكىنى؛ امەريكا جيانگەرلىگىنە قارسى تۇرىپ، چاۋشيانعا كومەك بەرۋ سوعىسىندا ىستەتىلگەن قارۋ-جاراق؛ «يدەيانى ازات ەتىپ، شىندىقتى ٴىس جۇزىنەن ىزدەپ، ٴبىر نيەتتە ىنتىماقتاسا العا باسايىق» دەگەن ٴسوزدىڭ تەزيس نۇسقاسى؛ ەكونوميكالىق ەرەكشە رايون قۇرۋ سۋرەت كارتينالارى؛ كەدەيلىكتەن قۇتىلدىرۋدان قامال الۋ ساندى مالىمەت كەستەسى؛ حوشىنشان-ليشىنشان دوحترحاناسىنىڭ مودەلى... وسىناۋ باعالى مادەني مۇرالار ناق زاتتارى، شىنايى ارحيۆ ماتەريالدارى، جاندى سۋرەت كەسكىندەرى، شىندىققا جاناسىمدى قالپىنا كەلتىرىلگەن اۋەلگى كورىنىستەر شي جينپيڭ قاتارلى باسشى جولداستاردىڭ نازارىن وزىنە تارتتى. ولار ٴالسىن-ٴالى كىدىرىپ توقتاپ، زەر سالا كورىپ، تۇسىندىرمەنى مۇقيات تىڭداپ، قاتىستى جاعدايلاردى ەگجەي-تەگجەيلى ۇعىستى.

ەكسكۋرسيا اياقتاعاننان كەيىن، شي جينپيڭ قاتارلى پارتيالى باسشى جولداستار پارتيا تاريحى كورمە سارايىنىڭ قىزىل رەڭ زالىنا كەلدى. جۇڭگو كوممۋنيستىك پارتياسىنىڭ نارت قىزىل تۋى الدىندا، شي جينپيڭ وڭ قول جۇدىرىعىن كوتەرىپ تۇرىپ، باسشى جولداستاردى باستاپ پارتياعا كىرۋ سەرتىن قايتالاپ ايتتى، ايبىندى سەرت ٴۇنى زالدى جاڭعىرتتى.

بەيجيڭدەگى ج ك پ ورتالىق كوميتەتى ساياسي بيۋروسىنىڭ مۇشەلەرى، ورتالىق كوميتەت شۋجيچۋىنىڭ شۋجيلەرى، مەملەكەتتىك حالىق قۇرىلتايى تۇراقتى كوميتەت باستىعىنىڭ ورىنباسارلارى، مەملەكەتتىك كەڭەستىڭ مۇشەلەرى، ەڭ جوعارى حالىق سوتى مەكەمەسىنىڭ باستىعى، ەڭ جوعارى حالىق پروكۋراتۋراسىنىڭ باس پروكۋرورى، مەملەكەتتىك ساياسي كەڭەس ٴتوراعاسىنىڭ بەيجيڭدەگى ورىنباسارلارى جانە ورتالىق اسكەري ىستەر كوميتەتىنىڭ مۇشەلەرى كورمەنى ەكسكۋرسيالادى. 

来源：中央广播电视总台

主播：巴拉番

视频制作 : 那扎

微信制作：古丽美热

تومەندەگى 阅读原文 جالعانىمىن باسىپ حاباردىڭ تۇنىق كەسكىندى نۇسقاسىن كورىڭىزدەر