ەرىكتى تىلشىلەر ريزۋان ۇسەن قىزى، لي يران حابارلايدى.1-ايدىڭ 10-كۇنى، التاي قالالىق مادەنيەت، دەنە تاربيە، راديو-تەلەۆيزيا جانە ساياحات مەكەمەسى، التاي قالالىق وقۋ-اعارتۋ مەكەمەسى جانە التاي قالالىق لىشۇن دەنە تاربيە مادەنيەت شەكتى جاۋاپكەرشىلىك سەرىكتەستىگى بىرلەسىپ، 2024-جىلعى التاي قالاسى قارءۇستى تاڭداۋلى دەنە تاربيە دارىندىلارىن تاربيەلەۋ كۋرسىن اشتى.

التاي قالالىق مادەنيەت، دەنە تاربيە، راديو تەلەۆيزيا جانە ساياحات مەكەمەسىنىڭ قاتىستى جاۋاپتىلارى، گەنەرال تاۋى حالىقارالىق قار شاڭعى الاڭنىڭ A رايونىنداعى قارشاڭعى جابدىقتارى زالىنىڭ الدىنداعى الاڭقىدا كۋرستىڭ رەسمي اشىلعاندىعىن جاريالادى. قار جابدىقتارىمەن قارۋلانعان بالالار قارشاڭعى الاڭىنا كەلىپ، جاتتىقتىرۋشىنىڭ جەتەكشىلىگىندە شاڭعى تەبۋدىڭ قاعيدالارىن ۇيرەنىپ، جاتتىعۋدى رەسمي باستادى. 

 

التاي قالالىق 2-ورتا مەكتەپتىڭ وقۋشىسى ەرالى مۇراتبەك ۇلى بىلاي دەدى: وسى رەتكى كۋرسقا قاتىناسقانىما  قاتتى قۋانىشتامىن، جاتتىقتىرۋشىعا ىلەسىپ جاقسى ۇيرەنىپ، بيىك تاۋدان شاڭعى تەبۋ تەحنيكامدى جوعارىلاتىپ، جارىستارعا قاتىناسىپ، قارلى مەكەن التايعا داڭق اپەرسەم دەيمىن. 

 

بەيجيڭ شوۋگاڭ ونەركاسىپ شۋەيۋانىنىڭ بيىك تاۋدان سىرعاناۋدىڭ باس جاتتىقتىرۋشىسى جاڭ چياڭ بىلاي دەدى: بۇدان بۇرىن دا ەگجەي-تەگجەيلى تاربيەلەۋ جوسپار-جوباسىن جاساعان ەدىك،   بۇل جولى جاسوسپىرىمدەردىڭ  تۇلعالىق قابىلەتى مەن ورەسىنە نەگىزدەلىپ، تاعى دا سايكەستى جوسپارلار جاسادىق.قارشاڭعى تەبۋ قابىلەتى ءبىرشاما جاقسىلارىنا باسەكە تۇرعىسىنان قارقىنىن ءتىپتى دە  جوعارىلاتتىق، ورتا دارەجەلى، باستاۋىش دارەجەلى كەيبىر بالالار نەگىزدىك وقىتۋ بولىمىنەن باستاپ سىرعاناۋدىڭ كەيبىر نەگىزى مەن قابىلەتىن مىقتى يگەرۋىنە مۇمكىندىك جاسايمىز.

جوسپارعا ساي، وسى رەتكى تاربيەلەۋ كۋرس ۋاقىتى 20 كۇن، نەگىزىنەن بيىك تاۋدان شاڭعى تەبۋ جانە دالالىق قارشاڭعى تەبۋدى ارقاۋ ەتىپ، قالامىزداعى ورتا، باستاۋىش مەكتەپتەردەن تاڭداپ الىنعان شاڭعى تەبەتىن 50 وقۋشىنى اقىسىز تاربيەلەيدى.

 

التاي قالالىق مادەنيەت، دەنە تاربيە، راديو-تەلەۆيزيا جانە ساياحات مەكەمەسى پارتگرۋپپاسىنىڭ شۋجيى ەربول ونەرقان ۇلى بىلاي دەدى: كۋرستى اشۋداعى ماقساتىمىز-ءتىپتى دە كوپ جاستاردىڭ، ورەندەردىڭ قار – مۇز سپورتىمەن اينالىسۋىنا، جاناسۋىنا، قار-مۇزدى سەزىنۋىنە، قار-مۇز تەحنيكاسىن ۇيرەنۋىنە مۇمكىندىك جاساپ، بالالاردىڭ قار-مۇز قيمىلىنا قاتىناسۋ اۋەسى مەن قىزىعۋشىلىعىن  كۇشەيتىپ،   بالالاردىڭ قار-مۇزعا دەگەن سۇيىسپەنشىلىگىن جەتىلدىرۋ، سول ارقىلى التايدىڭ دەنە تاربيە ىستەرىنە ۇلەس قوسۋ.