ءوز حابارىمىز. 4-ايدىڭ 26-كۇنى تۇستەن كەيىن مەملەكەت ءتوراعاسى شي جينپيڭ بەيجيڭدە حالىق سارايىندا ا ق ش-نىڭ مەملەكەت ىستەر حاتشىسى بلينكينمەن كەزدەستى.

شي جينپيڭ بىلاي دەپ انىق ايتتى: بيىل جۇڭگو مەن ا ق ش ديپلوماتيالىق قاتىناس ورناتقاندىعىنىڭ 45 جىلدىعى. 45 جىلدىق بارىستاعى جۇڭگو-ا ق ش قاتىناسى بوران-شاشىنداردى باستان وتكىزىپ، بىزگە مىناداي ماڭىزدى وي سالدى: ەكى مەملەكەت قارسىلاس بولۋ ەمەس، قايتا سەرىك بولۋى؛ ءوزارا تابىسقا جەتۋى، بىر بىرىنە زيان جەتكىزبەۋى؛ پارىقتىلىقتى ساقتاپ ۇقساستىققا ۇمتىلۋى، جاۋ نيەتتى باسەكەلەس بولماۋى، سوزىندە تۇرۋى، ارەكەتتە ناتيجە جاراتۋى، ايتقانى ءبىر باسقا، ىستەگەنى ءبىر باسقا بولماۋى كەرەك. مەن العا قويعان ءوزارا قۇرمەت ەتۋ، بەيبىت قاتار تۇرۋ، سەلبەسە ورتاق يگىلىكتەنۋ ءۇش ۇلكەن پرينسيپى ءارى بۇرىنعى تاجىريبەلەردىڭ قورىتىندىسى، ءارى بولاشاققا بەت الۋ باعدارى.

شي جينپيڭ بىلاي دەپ باسا دارىپتەدى: 3 اپتانىڭ الدىندا، مەن بايدەن زۇڭتۇڭمەن تەلەفوندا سويلەسىپ، بيىل جۇڭگو-ا ق ش-قاتىناسىن ورنىقتىرۋ، دامىتۋ جونىندەگى ويلاردى تىلگە تيەك ەتىپ، ەكى جاق تاتۋلىقتى قاستەرلەۋ، ورنىقتىلىقتى ماڭىزدى ورىنعا قويۋ، سەنىمدى نەگىز ەتۋ كەرەكتىگىن العا قويدىم. مەن تاعى دا مىنانى دارىپتەدىم: «زور پايداعا قول جەتكىزگەن ءىرى ەلدەر شاعىن مەملەكەتتەرگە دە پايدا جەتكىزۋگە تەڭ ءمان بەرۋ كەرەك. بۇگىنگى دۇنيە ءجۇزى 100 جىلدا بولماعان زور وزگەرىس جاعدايىندا تۇر، بۇل وزگەرىسكە قالاي توتەپ بەرۋ ءداۋىر سۇراۋى، دۇنيە جۇزىلىك سۇراق. مەنىڭ جاۋابىم — ادامزاتتىڭ تاعدىرلاس ورتاق تۇلعاسىن قۇرۋدى ىلگەرىلەتۋ. بۇل جۇڭگو ديپلوماتياسىنىڭ تۋىنا اينالدى، دۇنيە جۇزىندەگى كوپتەگەن ەلدەردىڭ دە قارسى الۋىنا يە بولدى. جەر شارى وسىنداي ۇلكەن، ادامزات وسىنشاما كوپ ورتاق سايىسقا ءدوپ كەلىپ وتىر. جۇڭگودا بۇرىنعىلار «ءبىر كەمدەگىلەردىڭ تاعدىرى ءبىر» دەپ ايتقان، مەنشە، قازىر «جەر شارىنداعىلاردىڭ تاعدىرى ءبىر» دەپ تۇيىندەۋگە بولادى. ادامزات قوعامى تىنىستاس، تاعدىرلاس، باق پەن سورى بىتە قايناسقان ءارى ءبىر–بىرىنە سۇيەنىشتى. ەشكىمدە ءبىر-بىرىنەن ايرىلا المايدى. كوپشىلىك ورتاق يگىلىكتەنۋدى جۇزەگە اسىرۋ ءۇشىن ەڭ زور ورتاق تانىم ۇيىستىرۋى كەرەك. بۇل جۇڭگونىڭ دۇنيە ءجۇزى مەن جۇڭگو-ا ق ش قاتىناسىنا مامىلە جاساۋداعى نەگىزگى شىعار ءتۇيىنى. مەن باستان-اياق ءىرى ەلدە ءىرى ەل بولۋ ءۇشىن ءىرى ەلدىك دارقان پەيىل جانە جاۋاپكەرشىلىك بولۋ كەرەك دەپ قارايمىن. جۇڭگو مەن ا ق ش وسى جاعىندا ۇلگى كورسەتىپ، دۇنيە ءجۇزىنىڭ بەيبىتشىلىگى ءۇشىن جاۋاپكەرشىلىك ارقالاۋى، ءار ەلدىڭ دامۋىنا وراي جاراتۋى، دۇنيە ءجۇزىن الەۋمەتتىك ونىمدەرمەن قامداۋى، دۇنيە ءجۇزىنىڭ ىنتىماعى ءۇشىن بەلسەندى رول اتقارۋى كەرەك.

شي جينپيڭ بىلاي دەپ باسا دارىپتەدى: مەن بايدەن زۇڭتۇڭمەن سان-فرانسيسكودا كەزدەسكەندە، دۇرىس تانىمدى بىرلىكتە ورناتىپ، الاۋىزدىقتاردى بىرلىكتە ءونىمدى تىزگىندەپ، ءوزارا ءتيىمدى سەلبەستىكتى ورتاق كۇش سالا ىلگەرىلەتىپ، ءىرى ەلدىك جاۋاپكەرشىلىكتى بىرلىكتە ارقالاپ، گۋمانيتارلىق اۋىس-كۇيىستى بىرلىكتە جەبەۋ 5 نەگىزدىك تانىمدى العا قويدىم. بۇل جۇڭگو-ا ق ش قاتىناسى سىندى وسى عيماراتتا بولۋعا ءتيىستى ءتورت ارقالىق، سەگىز دىڭگەك دەۋگە بولادى.ءىرى پرينسيپ بەلگىلەنسە، باسقا ماسەلەلەر وڭاي شەشىلەدى. جۇڭگو جاق سەلبەسۋدى قالايدى، ءبىراق سەلبەستىك قوس باعىتتا بولۋعا ءتيىس.ءبىز باسەكەدەن قورىقپايمىز، ءبىراق باسەكە مۇلدە جاراسپاۋ ويىنى ەمەس، قايتا ورتاق العا باسۋ بولۋعا ءتيىس. جۇڭگو وداقتاسپاۋعا تاباندى بولادى، ا ق ش جاق تا «شاعىن توپ» قۇرماۋ كەرەك. ەكى جاقتىڭ دا ءوز دوسى جانە سەرىگى بولۋىنا بولادى، قارسى جاققا باعىتتالماۋ، قارسى تۇرماۋ، قارسى جاعىنا زيان جەتكىزبەۋ كەرەك. جۇڭگو جاق سەنىمدى، اشىق ۇستالعان، گۇلدەنگەن، دامىعان ا ق ش-ىن قۇپتايدى، ا ق ش-نىڭ دا جۇڭگونىڭ دامۋىنا بەلسەندى، ۇنامدى مامىلە جاساۋىن ءۇمىت ەتەدى. 

شي جينپيڭ بىلاي دەپ باسا دارىپتەدى: جۇڭگودا «كۇن سايىن ىلگەرىلەمەسەڭ، كۇن سايىن شەگىنەسىڭ» دەگەن ءسوز بار. جۇڭگو–ا ق ش قاتىناسى دا وسىنداي. جۇڭگو-ا ق ش قاتىناسىنىڭ ورنىقتى بولۋ اۋقىمى وڭاي-وسپاق قولعا كەلگەن جوق. ەكى جاق ۇيىرمەلەرىنىڭ ۇزدىكسىز قۇلشىنىپ، بايدەن زۇڭتۇڭ ەكەۋىمىز كەلىسكەن «سان-فرانسيسكو بولاشاق جوسپارىن» بەلسەنە تياناقتاندىرىپ، جۇڭگو-ا ق ش قاتىناسىنىڭ شىنايى ورنىقتى بولۋىنا، جاقسارۋىنا، العا ىلگەرىلەۋىنە كۇش قوسۋىن ءۇمىت ەتەمىن.

بلينكين اۋەلى، بايدەن زۇڭتۇڭنىڭ ءتوراعا شي جينپيڭگە جولداعان سالەمىن جەتكىزدى، ول بىلاي دەدى: بايدەن زۇڭتۇڭ ءتوراعا شي جينپيڭمەن سان-فرانسيسكودا كەزدەسكەننەن بەرى، ەكى جاق ەكى ەلدىڭ بارىس-كەلىسى، ەسىرتكىگە تيىم سالۋ، جاساندى زەيىن، گۋمانيتارلىق اۋىس-كۇيىس سياقتى سالالارداعى سەلبەستىكتەردە بەلسەندى ىلگەرىلەۋشىلىككە قول جەتكىزدى. بۇگىنگى دۇنيە كوپتەگەن كۇردەلى سىن-سايىستارعا ءدوپ كەلىپ وتىر، ءبارى دە ا ق ش مەن جۇڭگونىڭ سەلبەسىپ توتەپ بەرۋىن قاجەت ەتەدى. جۇڭگوعا ساپارلاي كەلگەن كەزدە، مەن بارىس-كەلىس جاساعان ا ق ش-نىڭ ءار سالاسىنىڭ جۇڭگوداعى قايراتكەرلەرى دە ا ق ش-جۇڭگو قاتىناسىنىڭ جاقسارۋىن ءۇمىت ەتتى. ا ق ش جاق «جاڭا قىرعي قاباقتىق سوعىسقا» بوي ۇرمايدى، جۇڭگونىڭ ءتۇزىلىسىن وزگەرتۋگە، جۇڭگونىڭ دامۋىن شاۋجايلاۋعا، وداقتاستىق قاتىناس ارقىلى جۇڭگوعا قارسى تۇرۋعا تالپىنبايدى، جۇڭگومەن قاقتىعىسقىسى كەلمەيدى. ا ق ش ءبىر جۇڭگو ساياساتىنا تاباندى بولادى، جۇڭگومەن قاتىناستى ساقتاپ، ەكى ەلدىڭ مەملەكەت باسشىلارى كەلىسكەن سان-فرانسيسكو ورتاق تانىمىن مۇقيات تياناقتاندىرىپ، اناعۇرلىم كوپ سەلبەستىك ورناتۋعا تالپىنىپ، قاتە تۇسىنىكتەن، قاتە تۇجىرىمداۋدان ساقتانىپ، الاۋىزدىقتاردى جاۋاپكەرشىلىكپەن باتىل تىزگىندەپ، ا ق ش-جۇڭگو قاتىناسىنىڭ ورنىقتى دامۋىن جۇزەگە اسىرۋدى ىلگەرىلەتۋدى ءۇمىت ەتەدى.

شي جينپيڭ بلينكيننەن بايدەن زۇڭتۇڭعا سالەم ايتتى. 

ۋاڭ ي كەزدەسۋگە قاتىناستى.