ءوز حابارىمىز. 4-ايدىڭ 15-كۇنى سۋداندا قارۋلى قاقتىعىس تۋىلعاندىعىنا تۇپ-تۋرا ءبىر جىل بولدى. سوعىس سۋدان ەكونوميكاسىنا كۇيرەتە سوققى بەردى. ەكسپورتتىڭ كەدەرگىگە ۇشىراۋى، ساۋدا قيمىلدارىنىڭ توقىراۋى قاتارلىلاردىڭ ۇستىنە اقشانىڭ قۇنسىزدانۋى، زات باعاسىنىڭ قاباعات ورلەۋى قوسىلىپ، بۇقارا سوعىس جاعدايىندا ماشاقاتتى كۇن كەشتى.

 

سۋداندىق ءبىر بۇقارا بىلاي دەدى: بارلىق سۋداندىقتار قاقتىعىستىڭ ىقپالىنا ۇشىرادى، ەشكىم دە سوققىدان امان قالمادى. كەيبىرەۋلەر ەڭبەكاقىسىن ۋاعىندا الا المادى، كەيبىرەۋلەر ەڭبەكاقىسىن مۇلدە الا المادى، تاعى بىرەۋلەر قوسىمشا قاراجاتتان ايىرىلىپ، ءار ايدا نەگىزگى ەڭبەكاقىعا عانا سۇيەنەدى، ونىڭ ءوزى 10 كۇنگە عانا سەپ بولادى.

 

سۋداننىڭ ساياسي ىستەر ساراپشىسى شاۋاني بىلاي دەپ تالداۋ جاسادى: سۋدان قارۋلى قاقتىعىسىن كەلىسسوز ارقىلى شەشۋ كەرەك. ەكى جاق قاقتىعىسقان بۇرىن جاسالعان جيدا مالىمدەمەسىن تياناقتاندىرۋ، قارۋلى كۇشتەر حالىقتىق قۇرىلعىلاردان شەگىنىپ شىعۋ، ادامگەرشىلىك كومەك بەرۋ قيمىلىن قامتاماسىزداندىرۋ كەرەك. 

 

سۋدان جەدەل كومەك اسكەري ءبولىمنىڭ باسشىسى 4-ايدىڭ 15-كۇنى بىلاي دەدى: جەدەل كومەك اسكەري ءبولىمى سوعىستى توقتاتۋدى، ادامگەرشىلىك كومەك ارەكەتىن قامتاماسىزداندىرۋدى، بەيبىتشىلىك كەلىسسوزىن قايتا باستاۋدى قالايدى. ول بىلاي دەدى: جەدەل كومەك اسكەري ءبولىمىنىڭ نىساناسى كەزەكتەگى داعدارىستى جالپى بەتتىك ساياسي جولمەن شەشۋ جوباسىن تاۋىپ شىعۋ، سۋداندا اكىمشىلىك ۇكىمەت قۇرىپ، مەملەكەتتى دەموكراتياعا جەتەكتەپ، باياندى بەيبىتشىلىكتى جۇزەگە اسىرۋ.

 

ب م ۇ-نىڭ باس حاتشىسى گۋتەررەس 4-ايدىڭ 15-كۇنى سۋداندا قارۋلى قاقتىعىس تۋىلعاندىعىنىڭ ءبىر جىلدىعى بايلانىسىمەن بىلاي دەپ مالىمدەمە جاريالادى: بۇل سوعىس سۋدان حالقىنا باعىتتالعان سوعىس بولىپ، سان مىڭداعان جاي بۇقارانى ءولىم-جىتىمگە دۋشار ەتتى، 18 ميلليون ادام اۋىر دارەجەدە اشارشىلىققا ۇشىرادى، ماڭىزدى حالىقتىق قۇرىلعىلار تۇبەگەيلى ءبۇلدىرىلدى. بۇل سوعىس حالىقارالىق ادامگەرشىلىك زاڭىنا قارسى سوعىس بولدى، قۇتقارۋ اۆتوموبيل اترەتى، ادامگەرشىلىك كومەك قىزمەتكەرلەرى جانە قامبالار شابۋىلعا ۇشىرادى، ايەلدەر مەن قىز بالالار جىنىستىق زورلىققا ۇشىرادى. 

 

مالىمدەمەدە مىنالار باسا دارىپتەلدى: قازىرگى قاقتىعىستان قۇتىلۋدىڭ بىردەن-ءبىر جولى ساياسي شەشۋ جوباسى. حالىقارالىق قوعام سۋداننىڭ سوعىستى توقتاتۋىن ورتاق كۇش سالا ىلگەرىلەتىپ، جالپى بەتتىك بەيبىتشىلىك اياق الىسىن باستاپ، سۋدان حالقىنىڭ بولاشاق بەيبىتشىلىك، حاۋىپسىزدىك تىلەگىن قاناعاتتاندىرۋى كەرەك.

 

اۋدارعان: قاناتبەك جۇماباي ۇلى

 

 

​